00;00;22

maang noondagozi

00;00;15;08 - 00;00;43;29
Sounds
Ikwe nagamo.

00;00;44;02 - 00;01;02;18
Narrator
Gakina awiya, niij-Anishinaabeg ogii-kizhaasigowaan giizisoon bimi’ayaanid imaa zaaga'iganing gaa-izhinikaadamaang “Gichi-gami”.

00;01;02;20 - 00;01;32;10
Narrator
Gichigami ondinigewag niij-Anishinaabeg. Niinawind wiin, owe gichi-zaaga’igan manidoowaadad. Onibiin ondinigem miinawaa bimaadiziimagad. Gotaanendaagwadgaye miinawaa Gagwaanisagikamigad.

00;01;32;12 - 00;01;49;01
Narrator
Gichigami Ojibweg ogichi-apiitendaanaawaa minawaa omanaajitoonaawaa.

00;01;49;03 - 00;02;01;13
Narrator
Omaa nibiing, miinawaa omaa zaaga’iganan miinawaa ziibiin oyaa gichi-aadisookaan.
Gaawiin apiji-niibiwa awiya ogikendanziin.

00;02;01;15 - 00;02;12;04
Narrator
Mii owe odaadisookaaniwaa apii niij­Anishinaabeg - Ojibweg ezhi­gikenimindwaa - gii-gichi­gotaanendaagoziwaad omaa Gichi­zaaga’iganikaang.

00;02;12;06 - 00;02;31;21
Narrator
Apii ashiniizhwaaswaak gikinoonowinan, owe aki gii-niigaanad meshkodoonigeng - miziwe aki meshkodoonigeng.

00;02;31;24 - 00;02;37;23
Sounds
Ininiwag wemitigoozhiimowag

00;02;37;25 - 00;03;04;21
Narrator
Iwe apii, Agaamaakii-ininiwag gigii-apenimonadaagonaanig nawaj awashime wiinawaa. Gigii-apenimona-daagonaanig ji­nichigetamawangwaa. Nawaj awashime epiitendaagok, gii-apenimowag gikendamang owe aki. Noongom dash gidizhi-gikenimaanaanig Wiisaakode-ininiwag - wemitigoozhii ­ ikidowin “bebaamisadoowaad.” Gii-ikidom gii-onji-ozhichigaadeg meshkodoonigeng. Gaawiin indaa­anwetanzii.

00;03;04;26 - 00;03;33;10
Sounds
Ininiwag wemitigoozhiimowag.

00;03;33;12 - 00;04;11;13
Narrator
Ongo Wiisaakode-ininiwag gii­gotaamingoziwag. Miinawaa nawaj gii­wiingeziwag - nawaj gaye gii-wendiziwag apiichidash awensiiyag. Wiisaakode-ininiwag gii-pimaawadaasowag meshkodooniganan miinawaa maanitaanan. Gaa-onjikoozonid omaa Agaamakii­ininiwag ogii-ozhitoonaawaan awashime ingodwaak meshkodoonigewigamigoon biinashigo iwidi Ningaabii’anong zhiiwitaaganibiing.

00;04;11;15 - 00;04;11;26
Narrator
Wiisakode-ininiwag gii-kabadoowog imaa miikanaang gaa-izhinikaadamaang “Gichi­ onigamiing.”Agaamakii-ininiwag ogii­ayaanaawaa gewiinawaa gaa­izhinikaadamowaad miikana: Apii gaa-ojaanimi’ayaag meshkodoonigeng, Gichi-onigamiing gii-izhi-nakwemon maanitaanaki nigaabii’anong nakake miinawaa Gichigami, Gichi-zaaga’iganan biinash waabanong nakake

00;04;11;29 - 00;04;22;22
Narrator
Nishwaasi ashi-aapita diba’&aan apiichaa, miikana gii-inamon. Gichi-onigam gii-izhi
gwayakomon Waakaa’igan Shaanat miinawaa Memegwiswiziibi biinash Gichigami. Gii-ishkwemon imaa gichimaanitaani-meshkodoonigewigamigong eyaag jiigibiig GichigamL

00;04;22;24 - 00;04;33;10
Narrator
Mewinzha, gaa-izhinikaadamang Gichi-onigamiing gii-maamawi-ojaanimi'ayaa ningaabii’anong Waabano-wajiwan.

00;04;33;12 - 00;04;46;02
Sounds
Madwewechigewag.

00;04;46;04 - 00;05;07;16
Narrator
Mii omaa gaa-ondanokiiwaad ingi Agaamakii-ininiwag. Wiisaakode-ininiwag gaa-ondaawanaawaad maanitaana’ ningaabii’anong ogii-nagishkaanaawaan jiimaanan wendaawadoonid meshkodooniganan Waabanong. Mooniyaang onji-dagoshinoomagad wendinigaadeg Agaamakiing - okonaasan, biisweyiigin, mookomaanan miigoo gaye onaman wendinigaadeg Aniibiishike- ininiiwaakiing.

00;05;07;17 - 00;05;57;25
Narrator
Mii apii gakina gaapimaawanidiwaad omaa Gichi-onigamiing. Mii go dibishkoo oodenaayensing gaa-izhi’ayaag omaa. Ashi-ingodwaaswi waakaa’igaansan gii-ayaawan biinji­aadaako’igan epitaag ashi-bezhigozid. Miziwe omaa Makinaako-minis, gii­aadaako’igaazowag Anshinaabeg ji­biindiegsigwaa.

00;05;57;28 - 00;06;01;27
Narrator
Onigamiinsing aadaako-iganan gii­ozhichigaadewan andowenimindwaa ji­biindigewaad. Onzaam ingii-ondinamaagonaanig manitaana’.

00;06;01;29 - 00;06;16;26
Narrator
Omaanitaaniwaa’ amikog, waabizheshiwag miinawaa bebakaan awesiinyag gii-onji­oshki-ondinigewag niij-Anishinaabeg. Megwaa gii-maanitaanikeng, ingii-onji­kikendaamin ji-wiidanokiimangid waabishkiiwed. Maanitaanikeng gii-onji-kikenindiwag Agaamakii-ininiwag miinawaa Ojibweg ji­ wiidookaadiwaad ondiziwin.

00;06;16;28 - 00;06;26;18
Narrator
Gaawiin gakina daagii-izhiwebasinoon owe giishpiin ayaasigiban awesiinh ezhikaanangid amik.

00;06;26;21 - 00;06;45;28
Narrator
Agaamakiing gii-chaaginajigaazo apii ashi-niizhaawaswaak gikinoonowinan. Agaamakiing amiko-wiiwakwaan gii-gichi­apiitendaagwad. Miidash, Agaamakii-ininiwag, miiya’a amik wenji-kikendamowaad eyaag Gichi-onigam.

00;06;46;00 - 00;07;11;03
Narrator
Megwaa meshkodoonigeng, gaa-peshowak oodena mii’i Mooniyaa, wendabiwaad ingi maanitaani-meshkodoonigewigamigoon debendamowaad. Mooniyaa gii-ayaa ashi-niiwaak diba’ikaan, ishwaaso etawaag gii-apichaa bimishkaang.

00;07;11;06 - 00;07;28;25
Narrator
Maanitaanag gii-poozichigaazowag gichi­jiimaaning. Gegaago niiwin midaaswaak diba’ikaan - aazhawi zhiiwitaaganibiing ­ biinash iwidi eyaagin oodenaawan gaatazhi­ozhichigaadegin wiiwakwaanan miinawaa bisikiganan. Ono agaamakii-oodenaawan gii-ondaawajigaadewan biisikiganan miinawaa wiiwakwaanan nawaj waabanong nakake biinash igo awashime-waabanong.

00;07;28;25 - 00;07;33;18
Narrator
Gaagii-pagamiwijigaadeg iwidi Agaamakiing omaa gii-ondaawajigaadewan Onigamiing.

00;07;33;20 - 00;07;56;24
Narrator
Gaawiin wiin Agaamakii-inini miiwa’a Wemitigoozhi gaatagoshing nitam omaa gidakiiminaang. Ogii-kagwe mikaanaawaa ge-onji-zhaaboshkaawaad omaa Gichigami biinash iwidi Zhiiwitaaganibi Ningaabii’anong. Ashi­niizhwaaso-midaaswaak nisimidan-ashi-bezhig gikinoonowin, gii-tagoshin LeVerendrye - andobagosendang ji-mikang izhibii-ayaanig iwidi Aniibiishikewaakiing.

00;07;57;01 - 00;08;18;19
Narrator
Omaashkiigoo-Anishinaabe ezhinikaazod Ashaga ogii-mazinibii’amawaan nakake ge­onji-anjiseg maanitaani-meshkodoonigeng. Ashaga ogii-waabanda’aan LeVerendrye-an Gichi-onigam. Agaamakii-ininiwag gii-onji-minwiiwag ji­izhaawaad iwidi maanitaanakiing.

00;08;18;21 - 00;08;28;04
Narrator
Mii owe gaa-onji-kichi-apiitendaagok Gichi­onigam apii maanitaani-meshkodoonigeng.

00;08;28;07 - 00;08;34;26
Narrator
Ezhi-zaagidawaag, Memegwesiwiziibi magde’ayaa jidebishkinegin niibiwaa jiimaanan.

00;08;34;28 - 00;08;59;01
Narrator
Ogidaajiwan gii-ayaa gwetaanak baawitig ingodwaak-niishtana dasozid epitaad noongom ezhinikaadeg Ishpaa-Baawitig.

00;08;59;04 - 00;09;26;02
Narrator
Ogidaajiwan lshpaa-Baawitigong nawaj ani­ayaawan gwetaanakin. Ogijisadoong miinawaa wiimaawisidoong ezhi-giishkadinaag gotaanendaagod gegaago dibishkoo bimishkaang ezhi-baawitigokaag. Oodena gaagii-ayaag Onigamiing gaawiin etago gii-onji-anikooyaasiinoon bebakaan akiin. Gii-onji-anikoo-ayaawan bebakaan izhitwaawinan. Nindanikoobijiganiban gii-gichi-apiitaadizi omaa Onigamiing. Adaawe-ikwe gii­izhinikaazo. lndinwewinaan ikidoomagadi’i-Meshkodoonigekwe

00;09;26;05 - 00;09;35;18
Narrator
Onigamiing, indanikoobijigan gii­pimiwizhiwe miinawaa gii-aanikanootamaage. Mii onowe gikenjiganan gechi­apiitendaagwakin gii-meshkodoonigeng.

00;09;35;21 - 00;09;53;16
Narrator
Gii-gichi-apiitendaagozi. Baataniinong ikwewag, dibishkoo Adaawe-ikwe, giiwiidookaazowag ji-onji-mino­doodaadiwaad Agaamakii-ininiwag miinawaa niij-Anishinaabeg.

00;09;53;18 - 00;10;23;01
Narrator
Agaamakii-ininiwag ingii-igonaan Ojibwe maagizhaa gaye Chippewaa. Niinawind dash wiin indizhinikaanidimin Anishinaabeg - maamawi-nitam awiyag eyaawaad omaa. lngichi-ayaa’ aanaanig ikidowag mewinzha gidayendaamin omaa akiing ezhi­gikendamaang Maakinaako-minisgaabeyi’ii biinashigo apii ezhi-bishkwendamaang odaanaang nakake.

00;10;26;16 - 00;10;39;00
Narrator
Nibi miziwe-eyaag ingichi-apiitendaamin dibishkoogo epiitendamaang aki.

00;10;39;02 - 00;11;05;13
Narrator
Nookomisiban miinawaa odinawemaagana’ ogii-piminizha’aanaawaa ezhi­aa’aandakiiwang. lngii-noodamewgewemin gabe­gikinoonowin, gii-niibing dash apii memindage ingii-minwiimin. Giingoonyag gii-piijigaazowag omaa endanaadiziyaang, ji-dazhi­giikinaapasondwaa miinawaa baasondwaa.

00;11;05;16 - 00;11;11;03
Narrator
Endaso-daagwaagig, ingii-manoominikemin.

00;11;11;05 - 00;11;16;18
Narrator
Manoomin gii-kaapizigaade gabe’ii ji­onizhishing.

00;11;16;21 - 00;11;40;02
Narrator
Gii-pawishkigaade gaye. Gii-kisinaag. apii izhinikaade biboon. Niijiiwaaganinaanig ingii-moodisigonaanig apii bibooni-gabeshiyaang. lngii-minwendaamin ji­meshkodoonigeyaang wegodogwenigo ge­onji-mino-bibooniziiyaang.

00;11;40;04 - 00;12;06;01
Narrator
Nawaj eshpendamaang, biboong apii ingii­waanii-amawaanaan amik, waabizheshi, miinawaa bebakaan awesiinyag. Ji-debibinangid amik, nindawaa’igemin aabajitooyaang eshkan gaa­meshkodoonigeyaang. Indininii-minaanig ezhi-biindaanimi’aawaad amikon imaa asabiin eyaanid anaamiindim.

00;12;06;03 - 00;12;11;15
Narrator
Ziigwang aanji-bimaadiziwag nii-Anishinaabeg.

00;12;11;17 - 00;12;21;13
Narrator
Apii gii-izhi-aandakiiwang, ingii-wiigwaasi­jiimaananikemin..

00;12;21;15 - 00;12;29;18
Narrator
Jiimaan ingii-aabajitoomin waasa ji-babaa-izhaayaang gakina ono Gichi-zaaga’iganan.

00;12;29;20 - 00;12;46;12
Narrator
Giiwenipaanadoon ji-bimishkaang miinawaa gii-mishkawaagamishkaawan. Gii-gichi-naangan gaye. Wiigwaas gii-onji­naanganoon ji-kakiiwewijigaadegin onigamiin biitawi-zaaga’iganiikaang.

00;12;46;14 - 00;13;09;12
Narrator
Ininiwag wemitigoozhii’amaazowag.

Wiisaakode-ininiwag gewiinawaa gii­chiimaanikewaag nisimidana-ashi­nishwaasi dasozid gii-akwaaniwan miinawaa gii-tebabiwag ashi-inogodwaaswi bemishkaawaad. Wiisaakode- ininiwag ogii­pimiwidoonaawaa niiwin niizh-midaaswaak epiitang.

00;13;09;15 - 00;13;34;26
Narrator
Ji-wenipanitaagwak,gaawiin daagi inakamigasinoon ji-maanitaani­meshkodoonigeng giishpiin wiigwaasi­jiimaanikaasinogiban. Ashi-niizhwaaswaak zhaangasimidana gikinoonoowiniimagak, Agaamakii-ininii-Adaawewigamig ogii­kabikaanaawaan Gichi-Waawiyegamaa­Zhiiwitaaganib Adaawewigamig. Gichi-onigam gii-niigaaniiwan awashime ingodwaak adaawewigamigoon -

00;13;34;28 - 00;14;03;02
Narrator
aaniind epiichaagin midaaswaak daso diba’ikaan! Apii gikinoonowin, Ojibweg miinawaa Agaamakii-ininiwag gii-ginigawidaawag. lngii-wiijitwaa-idimin. Megwaa maanitaani-meshkodoonigeng, giiwedino-ningaabii’an Adaawewigamig gii-pimaadiziimagad. Geniinawind sago.

00;14;03;04 - 00;14;13;16
Narrator
Megwaa dash maanitaani­meshkodoonigeng, gaawiin gakina gegoo gii­mino-ayaasinoon imaa Gichi-onigamiing.

00;14;13;18 - 00;14;34;03
Narrator
lshkodewaabo gii-meshkodoonigaadeg gii­onji-maji’ayaawag niij-Anishinaabeg gabe’ii. Miinawaa gii-tagoshinoomagad aakoziwin, ashi-niizhwaaswaak nishwaasimidana-ashi­niizh gikinoonowin miinawaa ashi-niizhwaaswaak nishwaasimidan-ashi-niswi gikinoonowin. Agaamakii-inini

00;14;34;05 - 00;14;56;03
Narrator
aakoziwin ezhinikaadeg Mamakisewin gii-nishiwemagad omaa Mikinaako-minising. Gaawiin gegoo ge-onji-aanzwenewaad. Ojibweg miziwe - memindage ingichi­ayaa’aanaanig Apii gaa-ishkwaa-ayaawaad, gakinago gaye indoojibwe-dibajimowinanaanan miinawaa indizhitwaawinaanan.

00;14;56;06 - 00;15;23;20
Narrator
lngoding igo, aakoziwin giimaajaamagad, gaawiin idash naasaab daa-izhi-ayaasiiwag Ojibweg. Geyaabigo gii-maanitaani-meshkodoonigem. Endaso niibin imaa Onigamiing, Giiwedino­Ningaabii’an Adaawaawigamig gii-kichi­inakamigad ezhinikaadang Agaamakii-inini -

00;15;23;21 - 00;15;38;04
Narrator
Nagishkaadiwin. Nagishkaadiwin gii-tazhise niibiwa dawaateg meshkodoonigeng, mino­izhiwebiziwin... miinawaa ingoding onzazaamiziwin.

00;15;38;07 - 00;15;59;11
Narrator
lngodibik endaso gikinoonowin biinje’ii imaa Gichi-abiwining gii-paapinakamigad. Niniiganiziiminaanig miinawaa gechi­apiitendaagosiwaad ikwewag gii­andomaawag ji-izhaawaad imaa Gichi­abiwining. Adaawe-ikwe miinawaa aanind ikwewas gii­wawezhi’owag wedinigaadegin ozhichiganan Agaamakiing

00;15;59;14 - 00;16;08;03
Narrator
miinawaa onizhishebizonan endazhi-ozhichigaadenig Mooniyaang.

00;16;08;06 - 00;16;24;10
Narrator
Gaawiin mashi-ingii-kikendanziimin jii-onji­miigaadiwaad aki Agaamakii-ininiwag miinawaa Gichi-mookomaanag mii apii gaa-ani-aanjiseg niibiwa gegoo.

00;16;24;12 - 00;16;45;02
Narrator
Gichi-mookomaanag gii-maazhi-toowag gii­kichimiigaading omaa. Zhaaganaashiiwakiing dash apii gaawiin mashi awiya ogii-ozhitoosiin apii ge-onji­maajiseg nakake maanitaanaki niingaabii’anong nakake Gichigami. Giishpiin nakake ayaag onji-maajiseg Zhaaganaashiiwaki giiwedinong Onigamiiing, Agaamakii-ininiwag debendamowaad Giiwedino-Ningaabii’an

00;16;45;02 - 00;17;04;14
Narrator
Adaawewigamig daa-ayaa Gichi-mookomaan-akiing. Ge-izhi-ayaag Gichi-onigam odakonaanaawaa niigaaniiwaad miinawaa diba’akii-ininiwag. Eni aanjiseg ashi-zhaangaso-gikinoonoowin, gii-tibaakonigewag.

00;17;04;16 - 00;17;32;27
Narrator
Oshki-diba’ikaan ezhiseg Zhaaganaashiiwaki gii-ayaa iwidi nakake Memegwesiwiziibiing, ingodwaaso- diba’ikaan giiwedinong apii Onigamiing. Mii gii-inaakonigeng ji-ayaag Agaamakii­inini-adaawewigamig imaa Gichi-mookomaan-akiing. Giiwedino-ningaabii’an Adaawewigamig gii­ sanagimaawag. ji-maajiigoziwaad iwidi nakake giiwedinong Memegwesiwiziibii iwidi nakake Agaamakii­inini debenimod Zhaaganashiiwaki.

00;17;32;29 - 00;17;53;25
Narrator
Niigaaniziwaad gii-inaakonigewag ji­ayaawaad oshki-adaawewigamig. Nidakiiminaan idash ogii­ pakwezhaanaawaa meyegiziwaad. Mii go ge nibiiminaan gaa-izhi-daashkinamowaad. Mii go ge nibiiminaan gaa-izhi-daashkinamowaad.

00;17;53;27 - 00;18;05;29
Narrator
Niinawind wiin, gaawiin owe Agaamakii­inini miinawaa Gichi-mookomaan akiiwanzinoon. Debenjiged ingii-ozhitamaagonaan owe aki niinawind niij-Anishinaabeg.

00;18;06;01 - 00;18;29;14
Narrator
Apii niizhwaaswaak miinawaa niizh gikinoonowin, eshkosewaad Giiwedino­Ningaabii’an Adaawewigamig jiimaanan giimaajiikozhiwewag omaa Gichi­onigamiing. Odooshki-adaawewigomiwaa da-ani-izhinikaade Waakaa’igan Winiiyam. Nindaanikoobijigan miinawaa aanind niij­Anishinaabeg,

00;18;29;14 - 00;18;56;03
Narrator
gaawiin apii gii­ ishkwaasesinoon maanitaani­meshkodooniwewin. Geyaabii niizhing bimaadiziwin giitanakamigad. Aabanaabiyaan, gii-kibaakosijigaadeg. Gichi­onigam adaawewigamig apii gii-ani­izhkwaase gaa-inakamigak omaa. Gii-wiidookaadiyaangiban miinawaa wendiziyaanigiban gaawiin geyaabi­naasaab daa-izhi-ayaasinoon.

00;18;56;03 - 00;19;13;04
Narrator
Ashi-nishwaaswaak niishtana-ashi-bezhig gikinoonowin, Giiwedino-Ningaabi’an Adaawewigamig gii-kinigawiiwag Gichi­Waawiyegamaa-Zhiiwitaaganibi Adaawewigamig. Eni ojichisegin ashi-nishwaaswaak naanimidana gikinoonowinan, gii­ ishkwaakamigad. Ezhikonayewaad gii-pakaanad miinawaa gaawiin geyabi gii-andowenjigaazosii amik maanitaan. Aaniind Ojibweg ikidowag mii apii

00;19;13;10 - 00;19;44;20
Narrator
kichi­izhiwebak gii-ishkwaaseg. Gaa-ani-izhiwebak miinawaa ezhinikaadamaang ‘’gawaanaandamowin.” Noojigo awiyag giipi-dagoshinoog omaa apii ashi-nishwaaswaak naanimidana gikinoonowinan ogii-ozhitoonaawaa Miniisootaa. Ojibweg gii-ikonizha’igaazowag odakiimiwaa, miinawaa gii-asaawag ishkoniganing.

00;19;44;22 - 00;20;07;10
Narrator
Ogii-andowenimigowaa’ ji-ishkwaa-Anishinabewiwaad, dibishkoogo enaadizid waabishkiiwed Gichimookomaan. Giizanagad, ingii-paazhijishkaamin idash.

00;20;07;13 - 00;20;18;17
Narrator
...miinawaa geyaabi indayaamin omaa.

00;20;18;19 - 00;20;38;07
Narrator
Gii-chaagimaajaawag Wiisaakode-ininiwag. Giiwedino-Ningaabii’ano-Adaaweigamigoon gaye. Geyaabi dash wiin ayaa omaa Gichigami miinawaa Onigamiing gaa­endaawaad.

00;20;38;09 - 00;20;45;07
Narrator
Gidoonaakonidizomin miinawaa giga-nawendaamin gidakiiminaan.

00;20;45;09 - 00;20;53;28
Narrator
Gid-Anishinaabewimin. Gi-Gichimookomaaniwimin gaye.

00;20;54;00 - 00;21;21;07
Narrator
Noongom geyaabi. Gid-Anishinaabewitoomin. Geyaabi giinooji aanaan giigoonh imaa Gichigami.

00;21;21;09 - 00;21;26;12
Joe
Ininiwag zhaaganaashiimowag.

00;21;26;14 - 00;21;52;28
Narrator
Geyaabi gidizhi-dibendaagozimin akiing. Omaa eyaaying gidoonji-anikoo-gikenimaanaanig gidinawemaaganinaanig gaagii-ani-maajaawaad. Dibishkoogo gete-Anishinaabeg gagii-izhi­ wiidookaagewaad mewinzha, noongom gegiinawind giiwiidookaadaamin Gichi­gibichiiwin. Onigamiing Gichi-gibichiiwin gii­ozhichigaade ge-onji-ganawenjigaadeg endanaadiziyang miinawaa gidibaajimowininaan.

00;21;53;01 - 00;22;02;14
Narrator
Onigamiing ayaa dibaajimowin gechi­apiitendamaan.

00;22;02;17 - 00;22;13;26
Narrator
Gedibaajimotawag niijaanis. Inbagosendam gewiinawaa ingoding

00;22;13;28 - 00;22;23;07
Narrator
ge-ani­inaajimotaadiwaad waasa niigaan.

00;22;23;10 - 00;22;27;22
Narrator
Miigwech.

00;22;27;25 - 00;22;50;01
Sounds
Maang noondaagozi.

00;22;50;04 - 00;23;20;13
Sounds
Madwewechigewag.

00;23;55;14 - 00;24;08;01
Sounds
Bibigwe.

00;24;08;03 - 00;24;45;01
Sounds
Ikwe nagamo.